එන්න... ධර්මය දකින්න...

නමෝ තස්ස භගවතෝ අරහතෝ සම්මා සම්බුද්ධස්ස.

වසර එකහමාරකට ආසන්න කාලය තුළ මෙ ම බ්ලොග් අඩවිය ඔස්සේ දහම් ලිපි අසූවකට ආසන්න ප්‍රමාණයක් බොහෝ දෙනා ගේ හිතසුව පිණිස පළකළෙමු. අද දින පළකරන්නට යෙදෙන මේ ලිපියේ අරමුණ වන්නේ ත්‍රිපිටක ග්‍රන්ථ මාලාව පිළිබඳ හැඳින්වීම සහ පරිගණක මාධ්‍යයෙන් පහසු පරිහරණය සඳහා නිමවූ බුද්ධජයන්ති ත්‍රිපිටක ග්‍රන්ථ මාලාව සහිත මෘදුකාංග පද්ධතිය පිළිබඳ ඔබ දැනුවත් කරවීම යි.



අප ගෞතම සම්මා සම්බුදුරජාණන් වහන්සේ පන්සාලිස්වසක් මුළුල්ලේ ලෝක සත්වයා ගේ හිත පිණිස ත්, සුව පිණිස ත්, වදාළ උතුම් ධර්මස්කන්ධය ත්‍රිපිටකය තුළ අන්තර්ගත ව පවතියි. ත්‍රිපිටකය විනය පිටකය, සුත්‍ර පිටකය, අභිධර්ම පිටකය ලෙසින් කොටස් තුනකින් සමන්විත ය. එ මෙන් ම ධර්ම විනය වශයෙන් ද, බෙදීමක් දැක්විය හැකි ය. එ හි දී ධර්ම කොටස ලෙස සැලකෙන්නේ සුත්‍ර හා අභිධර්ම පිටක යි. විනය ලෙස විනය පිටකය ගැනේ. 

සුවාසුදහසක්‌ ධර්මස්කන්ධය අතරින් 82,000 තරම් ධර්මස්කන්ධයක් බුදුරජාණන් වහන්සේ විසින් ම දේශනා කර ඇත. තව ත්, ධර්මස්කන්ධ 2,000 බුද්ධකාලීන මහාරහතන් වහන්සේලා දේශනා කර ඇති බව දැක්වේ. එයින් ද, විනය පිටකය සහ සුත්‍ර පිටකය ධර්මස්කන්ධ 21,000 බැගින් අඩංගු ය. අභිධර්ම පිටකයේ ධර්මස්කන්ධ 42,000 පවතී. 

• විනය පිටකය

භික්ෂු භික්ෂුණියන් සඳහා බුදු රජාණන් වහන්සේ විසින් පැනවු ශික්ෂා පද, ප්‍රඥ්ප්ති, විනය කර්ම ආදි කොට ගත් දෑ විනය පිටකයේ අඩංගු ය.  මෙ හි භික්ෂු භික්ෂුණියන් සඳහා නියෝග පනවා ඇති බැවින් විනය පිටකය "ආණා දෙසනා" ලෙස හදුන්වනු ලබයි.

1.පාරාජිකා පාලි
2.සංඝාදිසේස
3.පාචිත්තිය පාලි
4.භික්ඛුනී විනය
5.මහාවග්ග පාලි
6.චුල්ලවග්ග පාලි
7.පරිවාර පාලි
8.පාථිමොක්ඛ

• සූත්‍ර පිටකය

සූත්‍ර පිටකය තුළ ප්‍රධාන ලෙස සූත්‍ර ධර්ම අඩංගු කොට ඇත. බුදු රජාණන් වහන්සේ නොයෙක් විට කරන ලද සූත්‍ර දේශනා මෙ හි ඇතුළත් වේ. එ ම නිසා සූත්‍ර පිටකය ඇති දේශනා "වෝහාර දේශනා" යැ යි හදුවනු ලබයි. සූත්‍ර පිටකය ප්‍රධාන වශයෙන් කොටස් පහකින් සමන්විත ය.

1. දීඝ නිකාය
2. මජ්ඣිම නිකාය
3. සංයුක්ත නිකාය
4. අංගුත්තර නිකාය
5. ඛුද්දක නිකාය

• අභිධර්ම පිටකය

බුදුරදුන් ගේ ගැඹුරු ම ධර්ම දේශනා ඇතුලත් වනුයේ අභිධර්ම පිටකයේ ය. සූත්‍ර පිටකයේ විස්තර කර ඇති සිද්ධාන්ත හා විෂයයන් පිළිබඳ ව ඉතා ගැඹුරු පැහැදිලි කිරීම් අභිධම්ම පිටකයෙන් සිදු කෙරේ. සම්මුති ලෝකයෙන් බැහැර දේ පිළිබද කතා කර ඇති නිසා අභිධම්ම පිටකය ට “පරමත්ථ දේසනා‍” යැ යි කියනු ලැබේ. මෙ හි ග්‍රන්ථ 7ක් ඇතුලත් වේ.

1.  ධම්මසංගණිප්පකරණය
2.  විභංගප්පකරණය
3.  කථාවත්ථුප්පකරණය
4.  පුද්ගලපඤ්ඤත්තිප්පකරණය
5.  ධාතුකථාප්පකරණය
6.  යමකප්පකරණය
7.  පට්ඨානප්පකරණය

විවිධ යුගවල දී ඇති වූ අවශ්‍යතා අනුව ධර්ම සංගායනා පවත්වා වළගම්බා රාජ්‍ය සමයේ දී මාතලේ ආලෝක විහාරයේ දී ත්‍රිපිටකය ග්‍රන්ථාරූඪ කරන්නට යෙදුනි. ඒ අනුව එතෙක් මහසඟරුවන දිවිහිමියෙන් රක්ෂා කරමින් කටපාඩමින් රැගෙන ආ ත්‍රිපිටක ධර්මය අද දක්වා ම සුරක්ෂණය විය.

අතිපූජ්‍ය බලන්ගොඩ ආනන්ද මෛත්‍රීය මහානායක ස්වාමීන් වහන්සේ, අතිපූජ්‍ය වැලිවිටියේ සෝරත නායක ස්වාමීන් වහන්සේ, අතිපූජ්‍ය මඩිහේ පඤ්ඤාසීහ මහානායක ස්වාමීන් වහන්සේ, ආදී බුද්ධපුත්‍රයන් වහන්සේලා විසින් වසර විස්සකට අධික කාලයක් දැරූ සාමූහික ප්‍රයත්නයක ප්‍රතිඵලයක් ලෙස පාළි ත්‍රිපිටකය සහ ඊට සමගාමී ව සිංහල අර්ථය ද, නිරුපනය වන පරිදි  බුද්ධජයන්ති ත්‍රිපිටකය සකස් විය. හුදෙක් ම මෙය බුද්ධ භාෂිතය ට අනුකූල වන පරිද්දෙන් ම අර්ථ විකෘති කිරීමකින් තොර ව සකස් කිරීමට ත්‍රිපිටක සංස්කාරක මණ්ඩලයේ ගෞරවනීය ස්වාමීන් වහන්සේලා ප්‍රයත්න දරා ඇත.

එ බැවින් එ ම උතුම් කාර්යයේ අරමුණ තවදුරට ත් සාක්ෂාත් කිරීමේ අදහසින් අප විසින් විශාල පරිශ්‍රමයක් දරා බුද්ධජයන්ති ත්‍රිපිටක ග්‍රන්ථ මාලාවන් හි ඇති සියලු ධර්ම කොටස් ඉතා ක්‍රමානුකුල ව පෙලගස්වනු ලැබී ය. මේ නිසා අවශ්‍ය ඕනෑ ම සුත්‍රධර්ම කොටසක් ඉතා පසසුවෙන් ත්‍රිපිටකය තුළින් සොයාගැනීමේ හැකියාව සහ කියවීමේ හැකියාව පවතී.

මෙ ම පද්ධතිය සම්පූර්ණයෙන් ම නො මිලයේ බාගත කර ගැනීම සඳහා දැනට පහත දක්වා ඇති යොමු භාවිත කළ හැකි ය. සමස්ත පද්ධතිය 5.5 GB පමණ ප්‍රමාණයක් යුක්ත වේ.

බුද්ධජයන්ති ත්‍රිපිටක ග්‍රන්ථ මාලාව 

මෙය සම්පූර්ණයෙන් නො මිලයේ ලබාදෙන සේවාවක් වන අතර කිසිවකු ට ත් විකිණීමේ අවසරය ලබා දී නොමැත. කිසිවකුට ත් විකිණීමට නො හැකි අන්දමින් සකස් කර ඇත. මිලකළ නො හැකි උතුම් ධර්ම රත්නය බොහෝ දෙනා ට හිත සුව පිණිස නිවන් මග ට උපකාරවත් වනු පිණිස මෙ ලෙසින් ධර්ම දානයක් වශයෙන් පුජාකරන්නෙමු.

තෙරුවන් සරණ යි!