මට ආදරෙයි නම්...... (01 කොටස)

 නමෝ තස්ස භගවතෝ අරහතෝ සම්මා සම්බුද්ධස්ස

අද කතාකරන්න ට යන්නේ මං ගැන යි. මේ ලිපිය ලියන්නේ මට ආදරය කරන්න ට කලින් මං ගැන විස්තර ටිකක් කියන්න ට යි. ටිකක් දිග විස්තරයක් නිසා ලිපි කිහිපයකින් ඉදිරිපත් කරන්න ට යි බලාපොරොත්තු වන්නේ. මෙ හි දී මම කියන්නේ මට ආදරය කරන්න ට හෝ මට ආදරය නො කරන්න ට කියා හෝ නො වේ. එ ම තීරණය ලිපිය කියවූ පසු ගන්න.  මගේ නම, ගම, වයස, කොහොම වුණ ත්, මම සිතනවා හැම දෙනාම වගේ "මට" ආදරය කරනවා ඇති කියලා. කවුද මේ "මම".

බඹයක් පමණ දිගු පුළුලින් වූ "ලෝකය" ලෙසින් බුදුරජාණන් වහන්සේ හැඳින්වූ මා ගැන විස්තරය මෙතැන් සිට අරඹමු.  

මම මට, "මම" කියන්නේ ඇයි?
ඕනෑ ම සත්වයකු ට අරමුණු ලබා ගැනීම සඳහා සිත හා ඒ සමග බැඳි කුමන ආකාරයක හෝ කයක් අවශ්‍ය වේ. ශරීරයක් තරම් සත්වයා ට වැදගත් තව ත්, යමක් නැත. මරණය ට පත් වන විට ශරීරය අතහරියි. එ විට පහල වන චුති සිතේ සිට ප්‍රතිසන්ධි සිතක් ඇතිවන තුරු සිත සුළඟ ට වැනෙන පරඞැලක් සේ ඒ මේ අත යමින් මහත් අසහනයකින් යුක්ත ව පවතී. ඒ නිසා ම ශරීරයක අවශ්‍යතාවය දැනෙන සත්වයා ගේ සිත කර්මානුරූපී ව මව් කුස ට බැසගෙන නව භවයක් කරා යයි. ඒ නිසා තමා ආදරය කරන තමා ට "මම" කියන නමින් කතා කරනවා. යමෙකු ට "මම" කියලා ලෝකයේ කතා කරන්න පුළුවන් එක් අයකුට විතරයි. එයින් ම මම මට ආදරය කරන තරම පෙනී යයි. වෙනත් අයකු ට ආදරය කරන්න ට ද, තමා ගේ ශරීරය අත්‍යවශ්‍ය වේ. එ සේ හෙයින් දැන් බලන්න ට යන්නේ "මම" හැදුණු දේවල් ගැන යි.

"මම" හැදුණු කොටස් තිස් දෙකක් පිළිබඳ ව බුදුරජාණන් වහන්සේ ගිරිමානන්ද සූත්‍රයෙන් දේශනා කර ඇත. මෙ සේ ගිරිමානන්ද සූත්‍රය දේශනා කරන්න ට යෙදුනේ ගිරිමානන්ද තෙරුන් ට ඇති ව තිබූ ශරීර ආබාධය දුරු කරවීම පිණිස ය.

"ආනන්දයිනි, මේ සස්නෙ හි මහණ පා තලයෙන් උඩ කෙස්මතුයෙන් යට සම හිමි කොට ඇති නානාප්‍රකාර අසූචියෙන් පිරි මෙ ම කය ප්‍රත්‍යවේක්ෂා කරන්නේ ය. මේ කයෙ හි කේශයෝ ය, රෝමයෝ ය, නිය ය, දත් ය, සම් ය, මාංශ ය, නහර ය, ඇට ය, ඇට මිදුලූ ය, වකුගඩු ය, හෘදය ය, අක්මාව ය, දලබු ය, බඩවැල් ය, පෙනහැලි ය, අතුනු ය, අතුනුබහන ය, උදරය ය, පුරීෂය ය, පිත ය, ශ්ලේෂ්මලය ය, පූයා ය, ලේ ය, සෝදි ය, මේද ය, කඳුළු ය, වසා ය, කෙල ය, මුකුණු ය, සඳ මිදුලූ ය, මුත්‍ර ය, යන මේවා ඇතැ යි, මෙ සේ කයෙ හි අශුභානුදර්ශී ව වාසය කරයි." 

මෙ ම ලිපියෙන් කෙස්, ලොම්, නිය, දත්, සම සහ මස් පිළිබඳ ව විමසා බලෙන අතර ඉදිරි ලිපිවලින් අනෙකුත් කොටස් පිළිබඳ විමසා බැලීම ට මා බලාපොරොත්තු වේ. මේ එක එකක් පිළිබඳ ව අපි තවදුර ට ත්, විමසා බලමු.

නිල්වන් කෙස් කළඹක්

කෙස් ප්‍රකෘති වර්ණයෙන් කළු පැහැති ය. ඇතැමුන් ගේ කෙස් දුඹුරු-තඹ පැහැයෙන් ද යුතු ය. කෙස් සෙසු කුණප කොටස් තිස් එක සමගින් ද මිශ්‍ර වීමක් නැත. මෙ ම රූපයේ පරිදි ඔබ ට ත්, මෙ වැනි සුන්දර කෙස් කළඹක් තිබෙන්න ට පුළුවන. නමුත් ඔබ සිතන්න, මෙවැනි කෙස්ගසක් හෝ ඔබ ගන්නා ආහාරයක ට වැටුනහොත් කුමක් දැනෙයි ද? එම ප්‍රණිත භෝජනය පවා පිළිකුල් කරනු ඇත. හිස-තෙල් ගැල්වීම්, මල් ගැසීම, සුවඳ වර්ග ආලේප කිරීම ආදියෙන් පිළියම් නො කරන හිසකෙස්වල දුර්ගන්ධය ඉතා පිළිකුල් සහගත ය. එය ට ත් වඩා ගින්නෙන් පිළිස්සෙන කෙස්වල දුර්ගන්ධය ඉතා පිළිකුල් සහගත ය. කෙස් වනාහි වර්ණයෙන් හා සටහනින් පිළිකුල් නො වුණත් ගන්ධයෙන් නම්, පිළිකුල් ම ය. "මගේ කොණ්ඩය" පිළිබඳ මෙ සේ දත යුතු ය.

ලොම් මේ වගේ

ලොම් සාමාන්‍යයෙන් කලූ-දුඹුරු-තඹ ආදි වර්ණයෙන් යුතු ය. සම මත බොහෝ සෙයින් පිහිටා ඇත. දහඩිය, දුවිලි සහ තව ත් අපද්‍රව්‍ය සමග ලොම් ගැටී ඇති නිසා මේ හි පිළිකුල් බව තව තව ත්, වැඩි වී ඇත. "මගේ ලොම්" පිළිබඳ ව ද, ඉහත සඳහන් කරන්න ට යෙදුනු කෙස් මෙන් ම ඉතා පිළිකුල් බව ඔබ ට අමුතුවෙන් කිව යුතු වන්නේ නැත.
 

බලන්-නිය දෙස මෙ ලෙසින්
නියපොතු විස්ස සාමාන්‍යයෙන් සුදු පැහැති ය. ඇඟිලි අග මතුපිට පිහිටා ඇත. නියපොතු පිළිබඳ ඇතැම් දෙනා, විශේෂයෙන් ම කාන්තාවන් සැලකිලි දක්වයි. 

නිය ආලේපන සහ තවත් නානාප්‍රකාර දේවල් නියපොතුවල ට සිදු කරති. නමුත් නියපොතු පිළිබඳ ව කියන්න ට ඇත්තේ ද, පෙර සේ ම පිළිකුල් සහගත දෙයක් ලෙස ම යි. නියපොතු කපන විට නො පෑගෙන තැනක දී කපන්න ට ය, යි කීම තුළින් ම "මගේ නියපොතු" පිළිබඳ ඇති පිළිකුල මනා ව දර්ශනය වේ.
 

සිනා බෝ වන්න ට....
"සිනා බෝ වන්න ට" දත් අවශ්‍ය ම දෙයකි. පිරිපුන් දත් ඇතියෙකුට දත් දෙතිසක් ඇති අතර ඒවා සාමානය්‍යයෙන් සුදු පැහැති ය. දත් වර්ග කිහිපයක් ම ඇති අතර ඒ ඒ දත්වලින් සිදුවන කෘත්‍යයන් අනුව ඒවා හැඩගැසී ඇත. ඔබ දිනක් හෝ දත් මදින්නේ නැති ව සිටියහොත් කුමක් නම් දැනෙන්නේ ද? ඉතා විශාල පිළිකුල් බවකි. මෙ සේ "මගේ දත්" පිළිබඳ ව මෙ සේ පිළිකුල් බව සිහිකට යුතු ය.
 

සුසිනිඳු දීප්තිමත් සමක්
මුළුමහත් ශරීරය වෙළා පවතින සම,  කළු, දුඹුරු ආදි වර්ණයන්ගෙන් යුතු සියුම් ස්ථරයකි. එ ම ස්තරය ට යටින් පිහිටි සම සාමාන්‍යයෙන් සුදු පැහැති ය. අපේ සමේ මතුපිට ස්තරයන් අජීවී ය. එ නම් මිය ගොස් ඇත.

ගින්නෙන් පිලිස්සීම, ආයුධවලින් තුවාල වීම ආදි හේතූන් නිසා සිවිය විවර වූ කල් හි යටින් පිහිටි සමෙ හි සුදු පැහැති බව ප්‍රකට වේ. එ විට මැස්සන් ආදී සතුන් දුගඳ නිසා ම එය වෙත ආදී එයි. සම ඒ තරම ට ම අපිරිසිඳු ය. අප ලෙඩ වූ විට දිනක් හෝ නො නා සිටින්න ට සිදුවුහොත් අප ට අප කෙරෙහි ම කොතරම් පිළිකුලක් ඇති වන්නේ ද? "සුසිනිඳු දීප්තිමත් සමක්" ලබා ගැනීම ට වෑයම් කරන බොහෝ දෙනා "මගේ සම" පිළිබඳ ව මෙ සේ පිළිකුල් බව සිහිකට යුතු ය.

මස් 1kg කීය ද?
මිනීමස් තවම කිලෝ ගණනින් අලෙවි නො කළ ද, ඇතැම් අය වෙනත් සතුන් ගේ මස් කිලෝ ගණනින් මිල ට ගෙන රස කරකර කන්නේ මේ බව දැන දැන ම ය. සාමාන්‍යයෙන් මස්පිඬු රතු රෝස පැහැති ය. ශරීරයෙහි පිහිටි ඇට තුන්සියයක ට වැඩි වූ
ඇටසැකිල්ල ආලේප කරමින් පිහිටා ඇත. අනෙක් සතුන් ගේ මස් ද, මීට සමාන ය. තරමක් ගැඹුරට සිදුවන තුවාලයක දී මස්පිඬු දැකිය හැක. එ හි අප්‍රසන්න බව කොතරම් දැ යි මෙ ම රූපයෙන් පෙනෙනු ඇත. "මගේ ඇඟේ මස්" පිළිබඳ ව මෙ සේ සිහිපත් කළ යුතු ය.

මේ අනුව පිටතින් අපි දකින, අපි ඇලෙන, අපි ආදරය කරන බොහෝ දේවල්වල ඇතුළත මෙ සේ බව ඔබ ට වැටහෙනු ඇත. අපි හැම දෙනා බොහොම හොඳින් රැක බලා ගන්නා, හැම දා ම කවන පොවනා, සුවඳවත් කරන මේ දෙතිස් කුණපයන් ගෙන් සැදි මේ සිරුර මෙ සේ අනිත්‍යතාවයෙන් යුතු වන බව අප මතක තබා ගත යුතු ය. මෙනයින් ඔබ මම, ඔබේ සහ මගේ ශරීර නැමති ලෝකය පිළිබඳ ව සිහි කළ යුතු ය. 

දැන් ඔබ "මගේ", "මම" කියූ මට, ආදරෙයි ද? නැත් ද? කියා සිතා බලන්න.

පිළිතුර :-ඔබ මට ආදරේ නැති නම් මීළඟ ලිපිය කියවා බලන්න.
පිළිතුර :-ඔබ මට ආදරේ නම් ඒත් මීළඟ ලිපිය කියවා බලන්න.

මේ පිළිකුල් භාවනාව වැඩීම ට කාලය යි. යමෙක් පිළිකුල් භාවනාව මෙනෙහි කරයි නම්, හෙතෙමේ නිවන් දැකීම ට පෙරාතුව ම නිවන් රසය වළඳන්නෙක් බව බුද්ධදේශනය යි. මෙ ම ලිපියේ අරමුණ වන්නේ ද, එය යි. මේ තුළින් සැම ට නිවන ම වේ වා! මීළඟ ලිපියෙන් හමුවන බලාපොරොත්තුවෙන් සැම ට....
තෙරුවන් සරණ යි!